കോഴിക്കോട് ഗോവിന്ദപുരം സ്വദേശി ദീപക്ക് ജീവനൊടുക്കിയ കേസിലെ പ്രതി ഷിംജിതയുടെ ജാമ്യാപേക്ഷ തളളി. കുന്നമംഗലം മജിസ്ട്രേറ്റ് കോടതിയാണ് ജാമ്യാപേക്ഷ തള്ളിയത്. ഇതോടെ കേസിൽ ഷിംജിത ജയിലില് തുടരും. ജാമ്യാപേക്ഷയില് വാദം നടക്കുന്നതിനിടെ പ്രതിക്ക് ജാമ്യം നല്കുന്നതിനെ പ്രോസിക്യൂഷന് ശക്തമായി എതിര്ത്തിരുന്നു. പ്രതിക്ക് സമൂഹത്തില് പ്രശസ്തിയും പോസ്റ്റുകള്ക്ക് കൂടുതല് റീച്ചും സാമ്പത്തിക ലാഭവും ലഭിക്കുന്നതിനായി കുറ്റം ചെയ്തുവെന്നാണ് പൊലീസ് കോടതിയില് സമര്പ്പിച്ച റിപ്പോര്ട്ടില് വ്യക്തമാക്കുന്നത്. അതിക്രമം നേരിട്ടെന്ന് പരാതിപ്പെടാതെ വീഡിയോ പ്രചരിപ്പിച്ചത് ദുരുദ്ദേശത്തോടെയാണെന്നും പൊലീസ് റിപ്പോര്ട്ടില് വ്യക്തമാക്കിയിട്ടുണ്ട്. പ്രതി പകര്ത്തിയ വീഡിയോ പോസ്റ്റ് ചെയ്തത് അല്ലാതെ ദീപക് മരിക്കാന് മറ്റ് കാരണങ്ങളില്ല. ജാമ്യം ലഭിച്ചാല് പ്രതി ഇനിയും സമാനമായ കുറ്റകൃത്യങ്ങളില് ഏര്പ്പെടും. മറ്റ് വ്ളോഗര്മാരും ഇത്തരം പ്രവര്ത്തികള് വീണ്ടും ചെയ്യുകയും അതുവഴി കൂടുതല് ആത്മഹത്യകള് ഉണ്ടാകാന് സാധ്യതയുണ്ടെന്നും പൊലീസ് സമര്പ്പിച്ച റിപ്പോര്ട്ടില് പറയുന്നു. ദീപകിന്റെ ആത്മഹത്യക്ക് പിന്നാലെ ഇക്കഴിഞ്ഞ 21നായിരുന്നു വടകര സ്വദേശി ഷിംജിത മുസ്തഫ അറസ്റ്റിലായത്. വടകരയിലെ ബന്ധുവീട്ടില് നിന്നായിരുന്നു ഷിംജിതയെ പൊലീസ് പിടികൂടിയത്.
ദീപക്കിന്റെ ആത്മഹത്യ കേസിൽ ഷിംജിത ജയിലില് തുടരും; ജാമ്യാപേക്ഷ തള്ളി
