കോഴിക്കോട്: നിർത്തിയിട്ട കാറുമായി മുങ്ങിയ യുവാവിനെ കാറുടമയും നാട്ടുകാരും പിന്തുടർന്ന് പിടികൂടി. കുറ്റ്യടി അടുക്കത്ത് ആശാരിപ്പറമ്പില് സ്വദേശി വിജീഷിനെ (41) യാണ് അറസ്റ്റ് ചെയ്തത്. കുന്നമംഗലം സ്വദേശിയായ മന്സൂറിന്റെ കാറുമായാണ് ഇയാള് കടന്നുകളയാന് ശ്രമിച്ചത്.
കാറിനുള്ളിൽ മൻസൂറിന്റെ മകൾ ഉറങ്ങിക്കിടക്കുന്നുണ്ടായിരുന്നു. ഇത് അറിയാതെയാണ് വിജീഷ് കാറെടുത്ത് സ്ഥലം വിട്ടത്. ഉടൻ തന്നെ നാട്ടുകാരെല്ലാം ചേർന്ന് രണ്ടര കിലോമീറ്ററോളം യുവാവിനെ പിന്തുടർന്ന് പിടികൂടുകയായിരുന്നു.
മന്സൂറും ഭാര്യ ജല്സയും ഒന്പത് വയസ്സുള്ള മകളും കുറ്റ്യാടിയിലെ ജല്സയുടെ വീട്ടിലേക്കുള്ള യാത്രയിലായിരുന്നു. അതിനിടെ കുറ്റ്യാടിയിൽ എത്തിയപ്പോള് കാര് നിര്ത്തി സാധനങ്ങള് വാങ്ങാനായി മന്സൂര് പുറത്തിറങ്ങി. ഉറങ്ങുകയായതിനാല് മകളെ വിളിച്ചില്ല. എസി പ്രവര്ത്തിച്ചിരുന്നതിനാല് കാര് ഓഫ് ചെയ്യാതെയാണ് മന്സൂര് പുറത്തിറങ്ങിയത്. എന്നാല് ഈ സമയം എത്തിയ വിജീഷ് കാറുമായി കടന്നുകളയുകയായിരുന്നു.
യാത്രാമധ്യേ പെൺകുട്ടിയെ വഴിയിൽ ഇറക്കി വിട്ടു. പിന്നീട് വഴിയരികില് നിന്നും കുട്ടിയെ കണ്ടെത്തുകയും ചെയ്തു. തുടർന്ന് കുറ്റ്യാടി പോലീസ് സ്ഥലത്തെത്തി യുവാവിനെ കസ്റ്റഡിയിലെടുത്തു.