എറണാകുളം: അമൃത ഹോസ്പിറ്റല് മെഡിക്കല് ഓങ്കോളജി വിഭാഗം മേധാവി ഡോ. കെ. പവിത്രൻ (63) അന്തരിച്ചു. ഉദര സംബന്ധമായ അസുഖത്തിനായി ചികിത്സയിലിരിക്കെയാണ് മരണം.
കഴിഞ്ഞ രണ്ട് പതിറ്റാണ്ടിലേറെയായി അമൃത ആശുപത്രിയിലെ സേവനത്തിലൂടെ ആയിരക്കണക്കിന് രോഗികള്ക്ക് ചികിത്സ നല്കിയ ഡോ. കെ പവിത്രൻ, രാജ്യത്തെ തന്നെ മികച്ച ഓങ്കോളജിസ്റ്റുകളില് ഒരാളായിരുന്നു.
വൈദ്യശാസ്ത്ര രംഗത്തെ ഡോ. കെ പവിത്രന്റെ അഗാധമായ പാണ്ഡിത്യവും, ഗവേഷണങ്ങളിലെ താല്പ്പര്യവും, വിദ്യാർത്ഥികളോടുള്ള കരുതലും എന്നും മാതൃകാപരമാണ്.
2023-ല് ഇന്ത്യൻ സൊസൈറ്റി ഓഫ് മെഡിക്കല് ആൻഡ് പീഡിയാട്രിക് ഓങ്കോളജിയുടെ ‘ലൈഫ് ടൈം അച്ചീവ്മെന്റ്’ അവാർഡ് ഉള്പ്പെടെ നിരവധി ആദരവുകള് അദ്ദേഹത്തെ തേടിയെത്തിയിട്ടുണ്ട്.
സംസ്കാരം നാളെ രാവിലെ 10 മണിക്ക് ഇടപ്പള്ളി ചങ്ങമ്പുഴ ശ്മശാനത്തില് നടക്കും.