തിരുവനന്തപുരം : എഡിഎം നവീൻ ബാബുവിന്റെ മരണത്തില് ലാൻഡ് റവന്യു ജോയിന്റ് കമ്മീഷണറുടെ അന്വേഷണ റിപ്പോർട്ട് ഇന്ന് റവന്യു മന്ത്രിക്ക് കൈമാറും.
കഴിഞ്ഞ ദിവസം ആണ് റവന്യു പ്രിൻസിപ്പല് സെക്രട്ടറിക്ക് റിപ്പോർട്ട് നല്കിയത്. പെട്രോള് പമ്പിന് എൻഒസി നല്കിയതില് നവീൻ ബാബു കാലതാമസം വരുത്തിയിട്ടില്ലെന്നാണ് കണ്ടെത്തല്.
നവീന് ബാബു കോഴ വാങ്ങി എന്ന ആക്ഷേപത്തിനും തെളിവില്ല. മരണത്തില് കൂടുതല് അന്വേഷണത്തിന് മന്ത്രി ശുപാർശ ചെയ്യാന് സാധ്യതയുണ്ട്.
എഡിഎം നവീൻ ബാബുവിന്റെ ആത്മഹത്യ കേസില് പ്രതി പി.പി ദിവ്യയുടെ മുൻകൂർ ജാമ്യഹർജിയില് ഉത്തരവ് നാളെ വരും. തലശ്ശേരി പ്രിൻസിപ്പല് സെഷൻസ് കോടതി ജഡ്ജ് നിസാർ അഹമ്മദാണ് ഉത്തരവ് പറയുക.
ദിവ്യ ആസൂത്രിതമായി യാത്രയയപ്പ് യോഗത്തിലെത്തി വ്യക്തിഹത്യ നടത്തിയെന്നും, പ്രേരണക്കുറ്റം നിലനില്ക്കുമെന്നുമാണ് പ്രോസിക്യൂഷൻ വാദം. ദിവ്യക്കെതിരായ സംഘടനാ നടപടി ചർച്ച ചെയ്യാൻ സിപിഎം ജില്ലാ നേതൃയോഗങ്ങള് ബുധനാഴ്ച ചേരും.