കൊച്ചി: ജനശ്രദ്ധ നേടിയ ‘കാക്ക’ എന്ന ഹ്രസ്വചിത്രത്തിലൂടെ ശ്രദ്ധ നേടിയ നടി ലക്ഷ്മിക സജീവൻ അന്തരിച്ചു.
ഷാര്ജയില് വച്ച് കഴിഞ്ഞ ദിവസമായിരുന്നു അന്ത്യം. പള്ളുരുത്തി സ്വദേശിയായ സജീവന്റെയും ലിമിറ്റയുടെയും മകളാണ്. ഹൃദയാഘാതമാണ് മരണകാരണമെന്നാണ് വിവരം. എന്നാല് ഇക്കാര്യത്തില് വ്യക്തതയില്ല.
കഴിഞ്ഞ കുറച്ച് കാലങ്ങളായി ഷാര്ജയില് ജോലി ചെയ്തുവരികയായിരുന്നു.
കാക്ക എന്ന ഹ്രസ്വചിത്രത്തില് ശ്രദ്ധേയമായ വേഷമാണ് ലക്ഷ്മിക അവതരിപ്പിച്ചത്. ശാരീരികവൈകല്യങ്ങളുടേയും പേരില് പരിഹസിക്കപ്പെടുന്ന മാറ്റിനിര്ത്തപ്പെടുന്ന മനുഷ്യരുടെ അതിജീവന കഥ കൂടി ആയിരുന്നു കാക്ക.
ചിത്രം പ്രക്ഷക-നിരൂപക പ്രശംസകള് നേടിയിരുന്നു. ശേഷം മലയാള സിനിമയിലും ലക്ഷ്മിക ചില വേഷങ്ങള് ചെയ്തിട്ടുണ്ട്.
യമണ്ടൻ പ്രേമകഥ, പഞ്ചവര്ണത്തത്ത, സൗദി വെള്ളക്ക, പുഴയമ്മ, ഉയരേ, ഒരു കുട്ടനാടൻ ബ്ലോഗ്, നിത്യഹരിത നായകൻ തുടങ്ങിയ ചിത്രങ്ങളില് ലക്ഷ്മിക ചെറിയ വേഷങ്ങള് ചെയ്തിരുന്നു. ലക്ഷ്മികയുടെ മരണം ഇപ്പോഴും വിശ്വസിക്കാൻ സാധിക്കുന്നില്ലെന്നാണ് സുഹൃത്തുക്കള് സോഷ്യല് മീഡിയയില് കുറിക്കുന്നത്.